Иерей: Благословен Бог наш. Лик: Аминь. Царю Небесный: Таже чтец: Трисвятое по Отче наш: Возглас: Яко Твое есть Царство. Чтец: Аминь. Господи, помилуй (12 раз). Слава, и ныне: Приидите, поклонимся:
Псалом 50.
Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя. Я́ко беззако́ние мое́ аз зна́ю и грех мой предо мно́ю есть вы́ну. Тебе́ Еди́ному согреши́х, и лука́вое пред Тобо́ю сотвори́х, я́ко да оправди́шися во словесе́х Твои́х и победи́ши, внегда́ суди́ти Ти. Се бо в беззако́ниих зача́т есмь, и во гресе́х роди́ мя ма́ти моя́. Се бо и́стину возлюби́л еси́, безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся, омы́еши мя, и па́че сне́га убелю́ся. Слу́ху моему́ да́си ра́дость и весе́лие, возра́дуются ко́сти смире́нныя. Отврати́ лице́ Твое́ от грех мои́х, и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́, и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́, и Ду́хом Влады́чним утверди́ мя. Научу́ беззако́нныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́, возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо, всесожже́ния не благоволи́ши. Же́ртва Бо́гу дух сокруше́н, се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая: тогда́ возложа́т на олта́рь Твой тельцы́.
Слава, и ныне: Аллилуиа (трижды).
Таже ектения: Миром Господу помолимся:
О свышнем мире:
О мире всего мира: до О богохранимей:
Приложи и сие:
О еже благословити доброе намерение рабов Своих (имярек), и благоизволити благополучно начати и спешно, кроме всякаго препятия, во славу Свою скончати, силою, действом и благодатию Пресвятаго Духа, Господу помолимся.
О еже труждающимся делателем благопоспешество в сем подати, и дела рук их исправити и в совершение силою, действом и благодатию Пресвятаго Духа спешно произвести, Господу помолимся.
О еже ко благому тщанию рабов Своих (имярек), благопоспешество со всяким довольством, силою, действом и благодатию Пресвятаго Духа подати, Господу помолимся.
О еже приставити делу сему и делателем Ангела Хранителя, еже невидимо отразити вся противныя вещи, видимых и невидимых врагов, и во всем благопоспешество, к сооружению же мудрость, и к совершению силу, силою, действом и благодатию Пресвятаго Своего Духа подати, Господу помолимся.
О избавитися нам от всякия скорби:
Заступи, спаси, помилуй:
Пресвятую, Пречистую:
Возглас: Яко подобает Тебе.
И а́бие диа́кон глаго́лет во глас 2:
Бог Госпо́дь, и яви́ся нам, благослове́н Гряды́й во И́мя Госпо́дне.
Стих 1: Испове́дайтеся Го́сподеви, я́ко Благ, я́ко в век ми́лость Его́.
Стих 2: Обыше́дше, обыдо́ша мя, и И́менем Госпо́дним противля́хся им.
Стих 3: Не умру́, но жив бу́ду, и пове́м дела́ Госпо́дня.
Стих 4: Ка́мень, его́же небрего́ша зи́ждущии, сей бысть во главу́ у́гла: от Го́спода бысть сей, и есть ди́вен во очесе́х на́ших.
Лик: Бог Госпо́дь… во глас 2, к коему́ждо стиху́.
Тропарь глас 2:
Творче и Создателю всяческих,/ Боже, дела рук наших, к славе Твоей начинаемая,/ Твоим благословением спешно исправи,/ и нас от всякаго зла избави,// яко един всесилен и Человеколюбец.
Слава, глас 6:
Скорый в заступление и крепкий в помощь,/ предстани благодатию силы Твоея ныне и благословив укрепи,/ и в совершение намерения благаго дела рабов Твоих произведи:// вся бо, елика хощеши, яко всесильный Бог творити можеши.
И ныне, глас тойже:
Предстательство христиан непостыдное,/ ходатайство ко Творцу непреложное,/ не презри грешных молений гласы,/ но предвари, яко Благая, на помощь нас, верно зовущих Ти:/ ускори на молитву, и потщися на умоление,// предстательствующи присно, Богородице, чтущих Тя.
Прокимен, глас 4: Буди светлость Господа Бога нашего на нас, и дела рук наших исправи.
Стих: И призри на рабы Твоя и на дела Твоя.
Апостол: К филипписием послания святаго апостола Павла чтение,
зачало 241.
Братие, якоже всегда послушасте мене, не якоже в пришествии моем точию, но ныне много паче во отшествии моем, со страхом и трепетом свое спасение содевайте. Бог бо есть действуяй в вас и еже хотети и еже деяти о благоволении. Вся творите без роптания и размышления, да будете неповинни и цели, чада Божия непорочна посреде рода строптива и развращена, в нихже являетеся якоже светила в мире, слово животно придержаще, в похвалу мне в день Христов.
Евангелие: От Матфея Свята́го Ева́нгелиа чте́ние,
зачало 20 [от полу].
Рече Господь: просите и дастся вам, ищите и обрящете, толцыте и отверзется вам. Всяк бо просяй приемлет, и ищяй обретает, и толкущему отверзется. Или кто есть от вас человек, егоже аще воспросит сын его хлеба, еда камень подаст ему? Или аще рыбы просит, еда змию подаст ему? Аще убо вы, лукави суще, умеете даяния блага даяти чадом вашим, кольми паче Отец ваш Небесный даст блага просящым у Него.
На сугубой ектении прошения:
Помилуй нас, Боже:
Еще молимся о Великом господине и отце нашем:
Еще молимся о богохранимей стране нашей:
Призри, Человеколюбче, милостивым Твоим оком на рабы Твоя (имярек), к Твоему благоутробию верою припадающыя, и услышав моления их, благое намерение и дело их благослови, и благополучно начати и спешно кроме всякаго препятия во славу Твою совершити, яко всесильному Царю молим Ти ся, услыши и помилуй.
Во всем споспешествуяй всем во благое, Господи, милостивно и рабом твоим (имярек), поспешествуй, Спасе, и во благополучное совершение делу их спешно произвестися, благослови, молим Ти ся, всемогий Владыко, услыши и помилуй.
Ангела Твоего Хранителя пристави делу сему, благоуветливе Господи, и еже воспятити вся препятия видимых и невидимых врагов, поспешство же во всем ко благополучному совершению делающим сотворити, молим Ти ся, преблагий Спасе, услыши и помилуй.
Во славу Твою вся творити повелевая, Господи, рабом Твоим (имярек), ко Твоей славе дело свое начинающым, благословением твоим поспешество благополучное с довольством к совершению подаждь, здравие им со благоденствием даруя, молим Ти ся, Вседаровитый Творче, услыши и помилуй.
Возглас: Услыши ны, Боже, Спасителю наш, упование всех концев земли и сущих в мори далече, и милостив, милостив буди, Владыко, о гресех наших, и помилуй ны. Милостив бо и человеколюбец Бог еси, и Тебе славу возсылаем, Отцу, и Сыну, и Святому Духу, ныне и присно, и во веки веков. Аминь.
Молитва:
Господи Иисусе Христе, Боже наш, приими усердное моление наше и благослови благое намерение и дело рабов Твоих (имярек), яже благополучно начати, и без препятия всякаго ко славе Твоей совершити. Делателем благопоспеши и дела рук исправи, и в совершение силою Пресвятаго Твоего Духа спешно произвести сотвори! Твое бо есть, еже миловати и спасати ны, Боже наш, и Тебе славу возсылаем, со Безначальным Твоим Отцем, и Пресвятым и Благим и Животворящим Твоим Духом, ныне и присно и во веки веков. Аминь.
Премудрость: Иерей: Пресвятая Богородице, спаси нас. Лик: Честнейшую Херувим: Иерей: Слава Тебе, Христе Боже, Упование наше, слава Тебе. Лик: Слава, и ныне: Господи, помилуй, (трижды). Благослови.
Иерей отпуст: Христос истинный Бог наш, молитвами Пречистыя Своея Матере, преподобных и богоносных отец наших, и всех святых, помилует и спасет нас, яко Благ и Человеколюбец. Аминь.